Jun 21

Lena asteko protagonista

Apirilaren bukaeran Lenari tokatu zitzaion asteko protagoniosta izatea.Gelan gauza asko egin genituen, esate baterako bere argazkiak ikusi genituen, Lenaren pisua eta altuera neurtu genituen, bere liburuko azala egin genuen, eta baita bere gorputzaren marrazkia egin eta koloreztatu ere. Lenari gehien gustatzen zaion kolorea arrosa da.

Ekarritako ipuin berezi bat kontatu genuen. Gabonetan landa etxean egon zen familia batek prestatu zuen ipuina, eta berriz, etorri zirenean, Lenaren familiari oparitu zioten. Zein polita zen ipuina!

Ostegun hartan, Lenaren urtebetetzea zenez, bi bizkotxo goxo jan genituen, eta hamaiketakoa bukatu bezain azkar, Lenaren etxera abiatu ginen. Iritsi ginenean, prestatu zuten jolasa egin genuen (fosilak aurkitu behar genituen). Bukaeran, oparitxo bat zegoen denontzat, Lenak egindako pultserak. Jolasa bukatu eta gero, zurbeltz ospetsua ikustera joan ginen, eta zurbeltz aurrean dagoen parkean tarte batez egon ginen.

Bazkaltzeko ordua zenez, poliki-poliki Lenaren etxerantz abiatu ginen, eta han bazkaldu genuen. Bazkaria oso goxoa zegoen, eta gela bat haurrentzat prestaturik dutenez (rokodromoa, zabua…), han egon ziren jolasten.

Eskolara bueltatzeko ordua iritsi zenean, ikasleak Lenaren etxean geratu ziren merendatzera, eta gu, bakoitza bere etxera joan ginen. Zein gustora pasa genuen eguna!

Eskerrik asko familia!

Argazki gehiago ikusteko, hemen klikatu.

May 05

Duna asteko protagonista

Martxoaren bukaeran Dunari tokatu zitzaion asteko protagonista izatea.

 

Gelan bere argazkiak eta txikitako arropa ikusi genituen, eta baita bere pisua eta altuera neurtu ere. Bere liburuko azala egin, eta bere gorputzaren marrazkia koloreztatu genuen. Duna ez da kolore bat edo bi bakarrik gustatzen zaizkion horietakoa, ez: kolore guztiak bere gustokoak dira.

 

Ostegun hartan Dunaren etxera joan ginen, eta iritsi bezain pronto, eliza aurrean dagoen parkean hamaiketakoa hartu genuen. Hamaiketakoa bukatu eta gero, Dunaren etxea erakutsi ziguten. Atzera berriz ere, parkera bueltatu ginen, eta Txemik prestatutako zirkuitoan jolastu genuen. Hori lana Txemik hartu zuena zirkuito hura prestatzen!

 

Jolasak bukatu genituenean, han bertan hasi ziren bazkaria prestatzen. Elizako aterpean mahaia jarri, eta oso gustura egon ginen bazkaltzen (txistorra, urdaia, saltxitxak …). Ikaragarri goxoa zegoen dena!

Bazkaria bukatu bezain laster, ordua zen eskolara bueltatzeko. Ederki pasa genuen goiza!

Eskerrik asko familia!

Argazki gehiago ikustero, hemen klikatu.

May 05

Andoni asteko protagonista

Martxoaren erdi aldean Andoniri tokatu zitzaion asteko protagonista izatea.

Gelan, beste gauza askoren artean, bere argazkiak ikusi, eta bere pisua eta altuera neurtu genituen. Bere liburuko azala sortu genuen, eta baita gorputzaren marrazkia egin eta koloreztatu ere. Andoniri gehien gustatzen zaion kolorea horia da.

Ostiral hartan Andoniren etxera joan ginen, eta arratsaldea oso entretenigarria izan zen. Etxean tarte bat pasa genuen, eta aurkitutako fosilak erakutsi zizkigun. Etxetik atera ginenean, txakurrak ikustera eraman gintuen. Ikusi eta gero, han dagoen parkera abiatu ginen, eta sokatira eta zapi-jolasean ibili ginen. Baina, oraindik, beste sorpresa bat zegoen: gozo-eltzea! Andonik hautsi zuen gozo-eltzea eta goxokiz beteta zegoen. Hura ikasleen poza goxokiak ikusterakoan!

Nahiz eta eskolara bueltatzeko ordua izan, txokolatea prestatu zigutenez bukatu arte han egon ginen. Gainontzeko gurasoak ere han agertu ziren, eta denon artean txokolatea jan genuen. Zein gustora izan ginen!

Eskerrik asko familia!

Argazki gehiago ikusteko, hemen klikatu.

May 03

Iharte protagonista

Martxoaren hasieran beste asteko protagonista bat izan genuen, Iharte.

 

Gelan gauza asko egin genituen, esate batetarako bere argazkiak eta txikitako arropa ikusi, eta baita tripan zegoenean amari egindako ekografiak ere azaldu zizkigun. Bere liburuko azala egin genuen, eta baita bere gorputzaren marrazkia egin eta koloreztatu ere. Iharti gehien gustatzen zaion kolorea morea da.

Ostegun hartan, Iharteren etxera joan ginen eta oso gustora egon ginen. Etxe aurrean dituzten gauzekin jolastu genuen, eta tartea bukatu eta gero, neguan Marokon egon zirenez, hango filminak erakutsi zizkiguten. Oso politak eta interesgarriak izan ziren. Berriz ere kalera abiatu, eta  marokoar bazkaria prestatzen hasi ginen. Asko gustatu zitzaigun janari berezi hori.

Bazkaria bukatu bezain laster, ordua zen eskolara bueltatzeko. Zein gustora izan ginen!

Eskerrik asko familia!

Argazki gehiago ikusteko, hemen klikatu.

May 03

Unai protagonista

Otsailaren erdian beste asteko protagonista bat izan genuen, Unai.

Gelan gauza pila bat egin genituen, esate baterako bere argazkiak ikusi. Argazki batean, jaioberria zen, eta hiru ordu besterik etzituen. Bere liburuko azala egin genuen, eta baita bere gorputzaren marrazkia egin eta koloreztatu ere. Ba al dakizue zeintzuk diren berak gehien maite dituen koloreak? Gorria eta beltza.

Unairi animaliak asko gustatzen zaizkio. Hainbeste gustatzen zaizkionez, munduko animaliarik ospetsuenen puzzle bat ekarri zuen, oso polita eta nahiko zaila zena. Unaik animaliei buruz asko daki, eta haien izenak oso ongi menperatzen ditu.

Ostegun hartan, Unairen etxera joan ginen eta oso gustora egon ginen. Iritsi ginenean, pirata bat agertu zen etxetik. Nor ote zen? Gure Unai zen. Bere gurasoek partxe bana eman ziguten begian jartzeko, eta denon artean, haiek prestatu zuten materialarekin, piraten ezpatak egin genituen. Ezpatak prestatu bezain laster, lorategira atera ginen, baina ez zen lorategi normala, baizik eta itsaso handi bat bi marrazoekin eta kanoiekin. Gurasoek prestatu ziguten jolasa egin genuen, eta oso dibertigarria izan zen.

Berehala pasa zen denbora, eta konturatu ginenerako, ordua zen eskolara abiatzeko. Zeinen gustora izan ginen!

Eskerrik asko familia!

Argazki gehiago ikusteko, hemen klikatu.

 

Mar 10

Marc protagonista

Orain dela hilabete bat inguru hasi ginen asteko protagonista lantzen, eta otsailaren hasieran Marci tokatu zitzaion.

Gelan, gauza pila bat egin genituen, besteak beste bere argazkiak ikusi. Hauen artean bi berezi zeuden: txikitan besoa hautsi zitzaion, eta argazkietan ikusten zen nola zegoen ospitalean. Bere liburuko azala egin genuen ere. Marci,  kolore bat edo bi bakarrik ez zaizkio gustatzen, baizik eta kolore guztiak bere gustukoak dira.

Astearte hartan, Marcen etxera joan ginen eta oso gustora egon ginen. Bere gurasoek etxea erakutsi ziguten, eta etxea ikusi eta gero, lorategira atera ginen eta animalia batzuk ikusi genituen (oiloak, antzara….). Lorategian tarte bat pasa genuen, eta prestatu zizkiguten jolasak egin genituen (puxiken jolasa eta aulkien jolasa). Nekaturik geundenez, bizkotxo goxo bat eta  zukua hartu genituen.

 

Berehala pasa zen denbora, eta konturatu ginenerako, ordua zen eskolara bueltatzeko.

Ostiralean, astea bukatzeko, Marcek hain gustuko duen mozorro festa egin genuen. Zeinen gustora izan ginen! Dantza eta salto, farre eta algara.

Eskerrik asko familia!

Argazki gehiago ikusteko, hemen klikatu. 

Nov 01

Kaixo guztioi!

Ongi etorri!